ಜೋಗಿ ಬರೆಯುತ್ತಾರೆ: ಇಲ್ಲಿ ಸಲ್ಲದ ಮಾತು…

(ಮಮತಾ ಜಿ. ಸಾಗರ ಲೇಖನಗಳ ಸಂಗ್ರಹಕ್ಕೆ ಜೋಗಿ ಬರೆದ ನಾಲ್ಕು ಮಾತು)

ಮಮತಾ ಸಾಗರ

ಯಾವುದೋ ಅಜ್ಞಾತ ದೇಶಗಳಲ್ಲಿ, ಅಪರಿಚಿತ ಕವಿಗಳ ಜೊತೆ ಓಡಾಡಿಕೊಂಡಿದ್ದು ಒಂದಾನೊಂದು ದಿನ ಇದ್ದಕ್ಕಿದ್ದಂತೆ ಪ್ರತ್ಯಕ್ಷವಾಗಿ, ನಮಗೇ ಗೊತ್ತೇ ಇಲ್ಲದ ಅದ್ಯಾವುದೋ ಭಾಷೆಯ ಕವಿಯನ್ನು ಹಿಡಿದು ತಂದು ಮುಂದೆ ಕೂರಿಸಿ, ಸೂಫಿ ಹಾಡುಗಳನ್ನು ಕೇಳಿಸಿ, ಸುಮ್ಮನೆ ಊಟ ಹಾಕಿಸಿ, ಒಮ್ಮೆ ಎತ್ತರದ ಮನೆಯ ರಾಣಿಯಂತೆಯೂ ಮತ್ತೊಮ್ಮೆ ಬಾಲ್ಯಗೆಳೆತಿಯಂತೆಯೂ ಇನ್ನೊಮ್ಮೆ ಅದಮ್ಯ ಜೀವನೋತ್ಸಾಹದ ಬತ್ತದ ಸೆಲೆಯಂತೆಯೂ ಭಾಸವಾಗುತ್ತಾರೆ ಮಮತಾ. ಇವರ ಮನೆ ಏಳು ಸುತ್ತಿನ ಕೋಟೆಯಂತೆಯೂ ವೀರಪಾಂಡೆ ಕೋಟ್ಟೈಯಿಲೆ ಎಂಬ ಹಾಡಲ್ಲಿ ಕಾಣಿಸುವ ದುರ್ಗದಂತೆಯೂ ನನಗೆ ಕಂಡು ಬೆಕ್ಕಸ ಬೆರಗಾಗಿಸಿದೆ. ವಿಶ್ವವಿದ್ಯಾಲಯ, ಕವಿಗೋಷ್ಠಿ, ನಾಟಕ, ಸಿನಿಮಾ, ಶಂಕರಪುರದ ಇಡ್ಲಿ, ಗಂಭೀರ ಚಿಂತನೆ, ತುಂಟಮಾತು, ಶರಂಪರ ಜಗಳ, ಜಿದ್ದಾಜಿದ್ದಿ, ಯಾವತ್ತೂ ಒಂದೇಟಿಗೆ ಸಿಗದ ಮೊಬೈಲು, ಬಗಲಿಗೆ ಬಿದ್ದ ಎಚ್ ಎನ್ ಆರತಿ -ಇವೆಲ್ಲ ಸೇರಿದರೆ ಮಮತಾ ಸಾಗರ ಭರ್ತಿ ಮತ್ತು ಪೂರ್ತಿ.

ಅವರ ಬರಹ

ಈಕೆಯ ಕುರಿತು ಹೊಟ್ಟೆಕಿಚ್ಚು. ಈಕೆಯ ಸುತ್ತಾಟದಲ್ಲಿ ಹುಟ್ಟುವ ಕವಿತೆ, ಎದುರಾಗುವ ಅನುಭವ, ಸಿಕ್ಕುವ ಸ್ತ್ರೀಪುರುಷರು, ಮನೆಯಾಳು, ಲಕ್ಷ್ಮಿ, ಸೂಫಿ, ಈಸೋಪ- ಎಲ್ಲರೂ ಸೇರಿದ ಶ್ರೀಮಂತ ಚರಿತೆ ಇದು. ಇಲ್ಲಿ ಸಲ್ಲುವ ಮಾತು ಅಲ್ಲಿಯೂ ಸಲ್ಲುತ್ತದೆ ಎಂದು ನಂಬುವುದು ಕತೆಗಾರ. ಅದು ಎಲ್ಲೆಲ್ಲಿಯೂ ಸಲ್ಲುತ್ತದೆ ಎಂದು ಭ್ರಮಿಸುವುದು ವಿಮರ್ಶಕ. ಎಲ್ಲ ಕಾಲಕ್ಕೂ ಸಲ್ಲುತ್ತದೆ ಎನ್ನುವ ಭರವಸೆ ಕವಿಗೆ. ಅದು ನಿಜದ ನಂಬುಗೆ ಕೂಡ.

ಮಮತಾ ಬರೆದ ಗದ್ಯ ಒಂದೇ ಗುಟುಕಿಗೆ ಓದುತ್ತಾ ಹೋದಾಗ ಎದುರಾದದ್ದು ವೈವಿಧ್ಯಮಯ ಅನುಭವಗಳ ಸಂತೆ. ಮಮತಾ ಯಾಕೆ ಕಾದಂಬರಿ ಬರೆಯಬಾರದು ಎಂಬ ಪ್ರಶ್ನೆ. ಎಂದೂ ತೀರ ಭಾವುಕವಾಗಿ ಮಾತಾಡದ, ಆದರೆ ಆರ್ದ್ರತೆ ಕಳೆದುಕೊಳ್ಳದ ಮಮತಾ ಬರಹ, ಆಕೆಯ ಖಾಸಗಿ ಡೈರಿಯಂತಿದೆ. ಆಕೆ ಮನಸ್ಸಿನಲ್ಲೇ ಮಾಡಿಕೊಂಡ ಟಿಪ್ಪಣಿಯಂತಿದೆ. ಇವು ಮುಂದೊಂದು ದಿನ ಕತೆಯಾಗಿಯೋ ಕವಿತೆಯಾಗಿಯೋ ಆತ್ಮಕತೆಯಾಗಿ ಮರುರೂಪ ತಳೆಯುವುದರಲ್ಲಿ ನನಗಂತೂ ಅನುಮಾನವಿಲ್ಲ. ಮಮತಾಗೂ ಆ ಅನುಮಾನ ಬೇಕಿಲ್ಲ.

More

ಪಾಕ ವಿಧಾನ : ಪಡೆಯಿರಿ ಬಹುಮಾನ …

ಕೃಷಿ ಮಾಧ್ಯಮ ಕೇಂದ್ರ ಸಿರಿಧಾನ್ಯ ಬಳಕೆಯ ಪಾಕವಿಧಾನಗಳಿಗೆ ಬಹುಮಾನ ನೀಡಲು ಉದ್ದೇಶಿಸಿದೆ. ಸಾವಿ, ರಾಗಿ, ನವಣೆ, ಸಜ್ಜೆ, ಅರ್ಕಾ, ಊದಲು, ಕೊರ್ಲು, ಬರಗ ಮುಂತಾದ ಸಿರಿಧಾನ್ಯಗಳಿಂದ ತಯಾರಿಸುವ ಸಾಂಪ್ರದಾಯಿಕ ಮತು ಹೊಸ ಅಡುಗೆಗಳನ್ನು ದಾಖಲಿಸುವ ಮತ್ತು ಅವನ್ನು ಪ್ರಚುರಪಡಿಸುವ ಉದ್ದೇಶದೊಂದಿದೆ ಭಾರತೀಯ ಸಿರಿ ಧಾನ್ಯಗಳ ಜಾಲ(ಮಿಲೆಟ್ ನೆಟ್‌ವರ್ಕ್ ಆಫ್ ಇಂಡಿಯಾ, ‘ಮಿನಿ’)ದ ಸಹಯೋಗದೊಂದಿಗೆ ಈ ಬಹುಮಾನ ಯೋಜನೆ ಹಮ್ಮಿಕೊಳ್ಳಲಾಗಿದೆ. ಇದುವರೆಗೆ ಒರಟುಧಾನ್ಯಗಳೆಂದು ಕಡೆಗಣಿಸಲ್ಪಟ್ಟಿರುವ, ಆದರೆ ಅಪಾರ ಪೌಷ್ಟಿಕಾಂಶಗಳ ಆಗರವಾಗಿರುವ ಮತ್ತು ಆಹಾರ ಭದ್ರತೆಗೆ ಪೂರಕವಾಗಿರುವ ಈ ಆಹಾರಧಾನ್ಯಗಳನ್ನು ಮತ್ತೆ ಜನಪ್ರಿಯಗೊಳಿಸುವ ನಿಟ್ಟಿನಲ್ಲಿ ಪಾಕವಿಧಾನ ದಾಖಲಾತಿ, ಪ್ರಚಾರವೂ ಸೇರಿದೆ.

ಆಸಕ್ತರು ಸಿರಿಧಾನ್ಯಗಳಿಂದ ತಯಾರಿಸುವ ಅಥವಾ ಅವುಗಳ ಬಳಕೆಯನ್ನೊಳಗೊಂಡ ಯಾವುದೇ ಬಗೆಯ ಅಡುಗೆಯ ಬಗ್ಗೆ ವಿವರ ಕಳಿಸುವಂತೆ ಕೋರಿಕೆ. ಅಂತಹ ಅಡುಗೆಗಳು ಸಾಂಪ್ರದಾಯಿಕವಾಗಿರಬಹುದು ಅಥವಾ ಹೊಸ ಅಡುಗೆಯಾಗಿರಬಹುದು. ಸಾಂಪ್ರದಾಯಿಕ ವಿಶೇಷ ಅಡುಗೆಗಳಿಗೆ ಆದ್ಯತೆ. ಪ್ರವೇಶಗಳನ್ನು ಕಳುಹಿಸುವಾಗ ಅಡುಗೆಗೆ ಬೇಕಾಗುವ ಸಾಮಗ್ರಿಗಳು, ಪಾಕ ವಿಧಾನ, ಆರೋಗ್ಯದ ದೃಷ್ಟಿಯಲ್ಲಿ (ರುಚಿ, ಶಕ್ತಿ, ಸತ್ವ, ಋತುಮಾನಕ್ಕನುಗುಣವಾಗಿ ಸೇವನೆ, ತಾಳಿಕೆ) ಅದರ ಮಹತ್ವ, ರಾಜ್ಯದ ಯಾವ ಭಾಗದಲ್ಲಿ ಈ ಅಡುಗೆ ಜನಪ್ರಿಯ ಇತ್ಯಾದಿ ವಿವರಗಳನ್ನು ನಮೂದಿಸಬೇಕು. ಜತೆಗೆ ಪ್ರವೇಶ ಕಳುಹಿಸುವವರ ಪುಟ್ಟ ಪರಿಚಯ (ಹೆಸರು, ಉದ್ಯೋಗ, ವಿಳಾಸ ಹಾಗೂ ಸಿರಿಧಾನ್ಯಗಳ ಕುರಿತು ಆಸಕ್ತಿಯ ಕಾರಣ) ಬರೆದಿರಬೇಕು. ಆಯ್ದ 10 ಪಾಕವಿಧಾನಗಳಿಗೆ ಬಹುಮಾನ ನೀಡಲಾಗುವುದು. ಎಲ್ಲ ಉತ್ತಮ ಪಾಕವಿಧಾನಗಳ ವಿವರವನ್ನು ಸಿರಿಧಾನ್ಯ ಕುರಿತ ಪುಸ್ತಕದಲ್ಲಿ ಪ್ರಕಟಿಸಲಾಗುವುದು.

ಪ್ರವೇಶಗಳನ್ನು ಕಳುಹಿಸಬೇಕಾದ ವಿಳಾಸ: ಕೃಷಿ ಮಾಧ್ಯಮ ಕೇಂದ್ರ, 119, 1ನೇ ಮುಖ್ಯರಸ್ತೆ, ನಾಲ್ಕನೇ ಅಡ್ಡರಸ್ತೆ, ನಾರಾಯಣಪುರ, ಧಾರವಾಡ – 580 008. ಪ್ರವೇಶ ತಲುಪಲು ಕೊನೆಯ ದಿನಾಂಕ: ಮಾರ್ಚ್ 20, 2011.

 

ಪ್ರಸಾದ್ ಸ್ವಗತ…

– ಜಿ.ರಾಜಶೇಖರ ಉಡುಪಿ

ನಿಮ್ಮ ಕವಿತೆಗಳು ನಿಜಕ್ಕೂ ಒಳ್ಳೆಯ ರಚನೆಗಳಾಗಿವೆ. ಕಾವ್ಯದ ಲಯದಲ್ಲಿ ನೀವು ತುಂಬಾ ವೈವಿಧ್ಯಮಯವಾದ ಪ್ರಯೋಗಗಳನ್ನು ನಡೆಸಿದ್ದೀರಿ. ಹೊಸಗನ್ನಡ ಕಾವ್ಯದ ಕೆ.ಎಸ್.ನ.,ಅಡಿಗ , ಬೇಂದ್ರೆ ಮುಂತಾದ ಕವಿಗಳ ಸಾಲುಗಳನ್ನು ಸಹ ನೀವು ತುಂಬಾ ಅರ್ಥ ಪೂರ್ಣವಾಗಿ ದುಡಿಸಿಕೊಂಡಿದ್ದಿರಿ. ಇದು ನನಗೆ ಯಾಕೆ ಮುಖ್ಯವಾಗಿ ಕಂಡಿತು ಎಂದರೆ , ಈಗ ಬರೆಯುವ ಅನೇಕ ಕನ್ನಡ ಕವಿಗಳು ತಾವೇ ಮೊದಲ ಬಾರಿ ಕಾವ್ಯ ಬರೆಯುತ್ತಿರುವವರು ಎಂಬಂತೆ ಬರೆಯುತ್ತಾರೆ.

ಕನ್ನಡ ಕಾವ್ಯ ಪರಂಪರೆಯ ಪರಿಚಯವೇ ಅವರಿಗಿಲ್ಲ! ಆದರೆ ಅದೆಲ್ಲಕ್ಕಿಂತ ಮುಖ್ಯವಾಗಿ ನನಗೆ ಕಂಡದ್ದು ಹಿಂದುತ್ವದ ವಿರುದ್ಧ ನೀವು ತೆಗೆದುಕೊಂಡ ಸ್ಪಷ್ಟವಾದ ನಿಲುವು. ಇದು ಕೂಡ ಈಗ ಕನ್ನಡ ‘ಬುದ್ದಿ ಜೀವಿಗಳಲ್ಲಿ’ ಅಪರೂಪವಾಗುತ್ತಿದೆ. ಹಿಂದೂ ಧರ್ಮದುರಂಧರರ ಬಗ್ಗೆ ನಿಮ್ಮ ವ್ಯಗ್ರತೆ , ವ್ಯಂಗ್ಯಗಳು ನನಗೆ ತುಂಬಾ ಇಷ್ಟವಾದವು. ಹಿಂದುತ್ವದ ವಿರುದ್ಧ ನಾವೆಲ್ಲರೂ ನಮಗೆ ಸಾಧ್ಯವಿರುವ ನೆಲೆಗಳಲ್ಲಿ ಹೋರಾಟ ಮಾಡುವ ಅಗತ್ಯವಿದೆ. ಇಲ್ಲವಾದರೆ ಅದು ನಮ್ಮನ್ನು ಹಂದಿಗಳನ್ನಾಗಿ ಮಾಡುತ್ತದೆ .

ಪ್ರೀತಿ ಅನ್ನುವ ಹೂವು ಬಾಡದಿರಲಿ ..

ಅದ್ಯಾಕೋ ಗೊತ್ತಿಲ್ಲ ಫೆಬ್ರವರಿ ಹದಿನಾಲ್ಕಕ್ಕೆ ಇರುವ ಮಹತ್ವ ಬೇರೆ ಯಾವುದಕ್ಕೂ ಇಲ್ಲವೇನು ಅನ್ನಿಸುವಂತೆ ಒಂದು ಬಗೆಯ ವಾತಾವರಣ ಕಲ್ಪಿತವಾಗುತ್ತದೆ. ಪ್ರಾಯಶ: ಪ್ರೀತಿಯ ಬಗ್ಗೆ ಇರುವಂತಹ ಆಹ್ಲಾದಕರ ಭಾವ ಇಂತಹ ಚೈತನ್ಯ-ಖುಷಿಯನ್ನು ಉಂಟು ಮಾಡುತ್ತದೆ ಎಂದು ಕಾಣುತ್ತದೆ.ಆದ್ರೆ ಪಾಪ ಹೃದಯ ಪಡಕೊಂಡವರಷ್ಟೇ ಮುರುಕೊಂಡವರ ಸಂಖ್ಯೆಯು ಇಂದು ಕಾಣುತ್ತೆ.

ಈ ಒಂದು ದಿನ ಇದೆ ಅಂತ ಸಾಮಾನ್ಯರಿಗೆ ಗೊತ್ತೇ ಇರಲಿಲ್ಲ, ಅಂತಹ ವಿಷಯ ಗೊತ್ತು ಮಾಡಿದ್ದು ನಮ್ಮ ವಾಹಿನಿಗಳು. ಅದರಲ್ಲೂ ದೃಶ್ಯ ಮಾಧ್ಯಮಗಳು ಒಂದೊಂದಾಗಿ ಯಾವಾಗ ಜನಸೇವೆಗೆ ನಿಲ್ತೋ ಆಗ ಶುರು ಆಯ್ತು ನೋಡಿ ಪ್ರೇಮಕ್ಕೊಂದು ಸುಗ್ಗಿ ಕಾಲ.ಇಂತಹ ದಿನ ಇದೆ, ಇದು ಹಿಂಗೆ ಅನ್ನುವ ಸಂಗತಿ ಬ್ಯಾಡ ಅನ್ನುವಷ್ಟು ಪ್ರಸಾರ ಮಾಡಿ ಬಿಡುತ್ತದೆ ವಾಹಿನಿಗಳು. ಆ ಮೂಲಕ ಸಂತ ವ್ಯಾಲೆಂಟೈನ್ ನೆನಪನ್ನು ಅಜರಾಮರ ಮಾಡಿದ್ದೇವೆ

ಪೂರ್ಣ ಓದಿಗೆ- ಮೀಡಿಯಾ ಮೈಂಡ್

ಹಂಗಾಮ ಕಾರ್ನರ್: ಸಂಜೆಯ ಅಪರಿಚಿತರು

-ಎಂ.ಆರ್.ಗಿರಿಜ
ಮುಗಿಲ ಮಾರಿಗೆ$ ರಾಗರತಿಯ ನಂಜ ಏರಿತ್ತ $ ಆಗ – ಸಂಜೆಯಾಗಿತ್ತ       -ಬೇಂದ್ರೆ

ಅಲೆದಾಟ ಮೊದಲಿನಿಂದಲೂ ನನ್ನ ಸಂಜೆಗಳ ಒಂದು ಭಾಗ ಸಂಜೆ ಸಂಜೆಯೇ. ಅದರ ಕಂಪು, ಗತ್ತು ಸುಂದರ ಮುಂಜಾವಿಗೂ ಇಲ್ಲ . ಸಂಜೆ ಮುದುಡುವುದೆಂದರೆ ಕನಸುಗಳು ಅರ್ಧದಲ್ಲೇ ಅರಳದೆ ನಿಂತುಬಿಟ್ಟಂತೆ. ಸುಂದರ ಸಂಗೀತ ಕಛೇರಿ ಉತ್ಕಟತೆ ನುಟ್ಟುವಷ್ಟರಲ್ಲಿ ತಟ್ಟನೆ ಕರೆಂಟ್ ಕೈಕೊಟ್ಟಂತೆ. ಬಟ್ಟೆ ಅಂಗಡಿ, ಪಾನಿಪುರಿ, ಕೇಕ್ ಅಂಗಡಿಗಳ ಮುಂದೆ ’ ಸುಳಿದಾಡಬೇಡ ಗೆಳತಿ’ ಎಂದು ಬುದ್ದಿ ಹೇಳಿದರೂ ಅದನ್ನು ಕೇಳುತ್ತಾ ಕೂರುವ ಜೀವವಲ್ಲ ನನ್ನದು.

ಅದರಲ್ಲೂ ಐಸ್ ಕ್ರೀಂ ಮೆಲ್ಲೂತ್ತಲೋ, ಪಾಪ್‌ಕಾರ್ನ್ ತಿನ್ನುತ್ತಲೋ ಜನದಟ್ಟಣೆಯ ನಗರ ಪ್ರದೇಶದಲ್ಲಿ ಒಬ್ಬಳೇ ತಿರುಗಾಡುವುದೆಂದೆರೆ ಅಚ್ಚುಮೆಚ್ಚು. ಇದು ’ದೋಸ್ತ್ ದೋಸ್ತ್ ನ ರಹಾ’ ತರಹದ ಒಂಟಿತನವಲ್ಲ. ಏಕಾಂತದ ಧ್ಯಾನ, ಜನರಾಣ್ಯದ ಬೆಳಕಿನಲ್ಲಿ ಜೀವೋನ್ಮಾದದ ಹುಡುಕಾಟ.

ಸುಮ್ಮನೆ ಯಾವ ಪರಿಚಿತರ ಕಣ್ಣಿಗೂ ಬೀಳದೆ ನಿರುಮ್ಮಳವಾಗಿ ಇರುವ ಸುಖದಲ್ಲೇ ಅದೇಷ್ಟು ಸುಖ? ಪುಟ್ಟ ಊರುಗಳಿಗೆ ಹೋಲಿಸಿದರೆ ದೊಡ್ಡ ಊರು ಆಕರ್ಷಕವಾಗಲು ಇದೂ ಕಾರಣವಿರಬೇಕು. ಪುಟ್ಟ ಊರಿನಲ್ಲಿ ಬದುಕಿದರೆ ಎಲ್ಲರ ಕಣ್ಣುಗಳಲ್ಲಿಯೂ ಮಿಕ್ಕೆಲ್ಲರ ಚಿರಪರಿಚಯ ಖಾಯಂ ಆಗಿ ಉಳಿದು ಬಿಟ್ಟಿರುತ್ತದೆ. ಎದುರಿಗೆ ವ್ಯಕ್ತಿ ಸಿಕ್ಕೊಡನೆ ಅವರಿರಲಿ, ಅವರ ಸುತ್ತ ಹತ್ತು ಜನರ ಕಂತೆ ಪುರಾಣಗಳೂ ಮಿದುಳಿನಲ್ಲಿ ಒಂದೊಂದೇ ತರೆದುಕೊಂಡು ಬಿಡುತ್ತವೆ. ಊಹೆಗೆ ಅವಕಾಶವಿಲ್ಲ. ಇನ್ನು ಅಪರಿಚಿತತೆಯ ಆನಂದವಂತೂ ಇಲ್ಲೇ ಇಲ್ಲ.

ನಗರದ ಜನದಟ್ಟಣೆಯ ಶಾಪಿಂಗ್ ಕಾಂಪ್ಲೆಕ್ಸ್‌ಗಳ ಬಳಿಯೋ , ಪಾರ್ಕಿಂಗ್ ಸ್ಥಳದ ಬಳಿಯೋ ಪಾರ್ಕಿನೊಳಗೋ ಸುಮ್ಮನೆ ಕೂತರೆ ಸಾಕು, ನಮ್ಮ ಮುಂದೆ ಅನಾವರಣಗೊಳ್ಳುವ ಪ್ರಪಂಚಕ್ಕೆ ಅದೆಷ್ಟು ಬಣ್ಣ! ಅಲ್ಲಿ ಸಿಳಿದಾಡುವ ಮುಖಗಳಲ್ಲಿ ಕುಣಿಯುವ ಅಂತಃ ಕರಣದ ಕಾಲುವೆಯ ವಿವಿಧ ಆವೆಮಡಿಕೆಗಳ ಕಂಪು, ರಂಗನ್ನು ಸವಿಯುತ್ತಾ ಕೂರುವುದಿದೆಯಲ್ಲ, ಇದಕ್ಕಿಂತ ದೊಡ್ಡ ಕ್ಲಾಸ್‌ರೂಂ ಎಲ್ಲಿ ಸಿಗುತ್ತದೆ?

More

ನಗ್ತಾರೆ ರಾಮಯ್ಯ

-ಸೂತ್ರಧಾರ ರಾಮಯ್ಯ

ಮುನ್ ನಗೆ ನುಡಿ

ಜೀವನವನ್ನು ವಿಕಟ ದೃಷ್ಟಿಯಿಂದ ನೋಡುವ , ಆಡುವ ಮಾತಿನಲ್ಲಿ ಗಾದೆಗಳನ್ನು ಬಳಸುತ್ತಾ ಶ್ಲೇಶಾರ್ಥಗಳನ್ನು ಹೊರಡಿಸುವ ಹವ್ಯಾಸ ನನಗೆ ಬುದ್ಧಿ ಬಂದಾಗಿನಿಂದ ಇದೆ. ಈ ಗೀಳು ನನಗೆ ಯಾವಾಗ, ಯಾರಿಂದ ಅಂಟಿಕೊಂಡು ಎಂದು ಒಮ್ಮೆ ಹಿಂದಿರುಗಿ ನೋಡಿದರೆ, ನನ್ನೂರು ದೊಡ್ದಾಲ ಹಳ್ಳಿಯ  ಪರಿಸರದ ತೆರೆ ಏಳುತ್ತದೆ , ಸ್ಯಾಂಪಲ್ ನೋಡಿ.

ರೈತ:  ಯಾಕೆ ಶೆಟ್ಟರೆ ನರಳ್ತಾ ಇದ್ದೀರಾ?
ಪಾಪಯ್ಯ ಶೆಟ್ರು : ಸುಮ್ನೆ ಕುತ್ಕೊಂಡು ಎನ್ಕೆಲಸ.
ಗಿರಾಕಿ: ಬಟ್ಟೆ , ಬಣ್ಣ  ಒಗಾಕಿಲ್ವ ಸೋಮಿ ಒಗುದ್ರೆ ?
ಜವಳಿ ಅಂಗಡಿ ನಂಜುಂಡಸ್ವಾಮಿ: ಬಟ್ಟೆನಾ ಕಾಲುವೇಲಿ ಒಗಿಬೇಡ .ನಿಂಗೇಗೌಡನ  ಕೊಳದಲ್ಲಿ ಒಗಿ. ಬಣ್ಣ ಎಲ್ಲೂ ಹೋಗಲ್ಲ ; ಅಲ್ಲೇ ಇರ್ತದೆ .
ಮೊಮ್ಮಗ : ತಾತ, ವೆಂಕಟೇಶ ತಲೆ ಮೇಲೆ ಹೊಡೆದುಬಿಟ್ಟ …
ತಾತ : ಏನು ನಿನಗೆ ಹೊಡೆದ್ನೆ? ಅವನ ಬಾಯ್ಗೆ ಬೆಂದನ್ನ ಹಾಕ, ಅವನ ಮನೇಲಿ ಎಂಟೆಮ್ಮೆ  ಕರೆಯಾ .., ಸಿಗಲಿ ಅವ್ನು …
ಹರಿಕಥೆ ಚೌಡಪ್ಪ : ಮನೆ ಮಗಳೆಸರು ಭಾಗ್ಯ , ಹೊಲ ಮನೆ ಎಲ್ಲ ಭೋಗ್ಯ . ಹೆಂಡ್ತಿ  ಹೆಸರು ಶಾರದೆ ಪಾಪ! ಮಕ್ಕಳಿಗೆ ಅ , ಆ, ಇ, ಈ ಹೇಳಿಕೊಡೋಕು ಬಾರದೆ?
“ಅವನು ಬುಡಪ್ಪಾ, ಅರೆ ಮೇಲೋದ್ರು (ಬೆಟ್ಟ)ಅನ್ನ ಉಟ್ಟುಸ್ಕೋತಾನೆ .
ಸ್ವಗತ: ಬುತ್ತಿ ಕಟ್ಕೊಂಡೋದ್ರೆ
” ಏನು , ಆ ನಸ್ಗುನ್ನಿ ಕಾಯ್ನ ನೆಂಬ್ತಿಯಾ ? ನೋಡ್ಲಾ ‘ಅಲಲಾ’ ಅನ್ನೋ ಅಳ್ಳಿಮರ  ನಂಬೋದು; ಮೆತ್ಗಿರೋ  ಕಳ್ಳಿ ಮರ ನಂಬಾರ್ದು ಜ್ವಾಕೆ .
” ಅವ್ನು ನಿನ್ಕೆಲಸ ಮಾಡಿಕೊಟ್ಟಾನ..? ನಿನಗೆಲ್ಲೋ  ಹುಚ್ಹು ಅದೇನೋ ಹೇಳ್ತಾರಲ್ಲಾ ‘ ಓಡೋಗೋ  ಬಡ್ಡಿಗೆ ಹಾಲ್ಗೆ ಹೆಪ್ಪಾಕ್ಬುಟ್ಟು ಹೋಗು ಅಂದರಂತೆ ಕೆಲಸ ನೋಡು ಮೂದೇವಿ
ಈ ಕೆಲಸ ನನ್ನ ಕೈಲಾಗಾಕಿಲ್ಲ ನಿನಾದ್ರೆ ವಯಸ್ನುಡುಗಾ ನೆಲ ಗುದ್ದುದರೆ ನೀರು   ಬತ್ತದೆ ಕಣ್ಣಲ್ಲಿ
ಬೊಮ್ಮ : (ಕುಡಿದ ಮತ್ತಿನಲ್ಲಿ ) ನಾಳೆಯೇ ನಿಮ್ಮ ದುಡ್ಡು ಕೊಟ್ ಬುಡ್ತೀನಿ . ಈ ಬೊಮ್ಮ ತಾಯಾಣೆ ಸುಳ್ಳೇಳಾಕಿಲ್ಲ  ಸತ್ಯವೇ ತಾಯಿ (ಪಕ್ಕಕ್ಕೆ ತಿರುಗಿ) ತಾಯೆ  ನಮಪ್ಪನ ಹೆಂಡ್ರು  ಮೊದಲಂಗೆ  ಮೋಸ ಮಾಡಾಕಿಲ್ಲ ಬುದ್ದಿ

‘ಅವಧಿ’ recommends ಟೋಬಾ ಟೇಕ್ ಸಿಂಗ್

ಬರ್ತಾ ಇದೆ ಹೊಸ ಪುಸ್ತಕ …

ಕನ್ನಡ, ಇಂಗ್ಲಿಷ್ ಪುಸ್ತಕ ಕೊಳ್ಳಲು ಅವಧಿ- Flipkart ಸಹಯೋಗದ

ಆನ್ ಲೈನ್ ಮಳಿಗೆಗೆ ಭೇಟಿ ಕೊಡಿ – ಇಲ್ಲಿ ಕ್ಲಿಕ್ಕಿಸಿ


 

%d bloggers like this: