ಹೆಚ್ಚಿನದನ್ನು ಸಾಧಿಸುವ ನಿರೀಕ್ಷೆ ನನಗಿಲ್ಲ

ಕರ್ನಾಟಕ ಪ್ರಕಾಶಕರ ಸಂಘ ಪುಸ್ತಕೋದ್ಯಮದಲ್ಲಿ ಆಸಕ್ತಿ ಇರುವವರಿಗೆ ಒಂದು ದಿನದ ಶಿಬಿರವನ್ನು ಹಮ್ಮಿಕೊಂಡಿದೆ. ಈ ಬಗ್ಗೆ ಅವಧಿಯಲ್ಲಿ ಪ್ರಕಟವಾದಾಗ ಹಿರಿಯ ಪುಸ್ತಕೋದ್ಯಮಿ, ಆತ್ಮೀಯರಾದ ಜಿ ಎನ್ ಅಶೋಕವರ್ಧನ ಅವರು ನೀಡಿದ ಪ್ರತಿಕ್ರಿಯೆ ಇಲ್ಲಿದೆ- ನಿಮ್ಮ ಸಲಹೆ ಚರ್ಚೆಗೆ ಸ್ವಾಗತ

ಈ ಹಿಂದೆ ಕನ್ನಡ ಪುಸ್ತಕ ಪ್ರಾಧಿಕಾರ ಇಂಥದ್ದೇ ಒಂದು ಶಿಬಿರವನ್ನು ಅಂಕೋಲದಲ್ಲಿ ಶ್ರೀ ವಿಷ್ಣು ನಾಯಕ್ ಅವರ ಸಹಯೋಗದಲ್ಲಿ ನಡೆಸಿದ್ದಾಗ ನಾನು ಆಹ್ವಾನಿತನಾಗಿ ಭಾಗವಹಿಸಿದ್ದೆ. ಮತ್ತೂ ಹಿಂದೆ ಡಾ| ರಾಜಕುಮಾರ್ ಎನ್ನುವವರು ಕೆಲವು ಊರು ತಿರುಗಿ ಇಂಥವೇ ಕಮ್ಮಟಗಳನ್ನು ಹೆಚ್ಚುಕಡಿಮೆ ವೈಯಕ್ತಿಕ ನೆಲೆಯಲ್ಲೇ ನಡೆಸಿದ್ದೂ ನನಗೆ ತಿಳಿದಿದೆ. ಅಲ್ಲೆಲ್ಲ ಅಂತಿಮವಾಗಿ ಹೊಲ ಹಸನು ಮಾಡುವ, ಉತ್ತಮ ಬೆಳೆ ತೆಗೆಯುವ ಮಾತು ಬರಲಿಲ್ಲ; ಕೇವಲ ಮಾರ್ಕೆಟಿಂಗ್ ತಂತ್ರಗಳ ಬಗ್ಗೆ ಚರ್ಚೆ ನಡೆಯಿತು. ಈಗ ಈ ಪ್ರಕಾಶಕರ ಸಂಘವಾದರೂ ಹೆಚ್ಚಿನದನ್ನು ಸಾಧಿಸುವ ನಿರೀಕ್ಷೆ ನನಗಿಲ್ಲ.

ಕನ್ನಡ ಪುಸ್ತಕ ಪ್ರಾಧಿಕಾರ ಇದೇ ಅಕ್ಟೋಬರ್ ಸುಮಾರಿಗೆ ಮಂಗಳೂರಿನಲ್ಲಿ ‘ಪುಸ್ತಕ ಮೇಳ’ ನಡೆಸಲು ಭಾರೀ ರಂಗ ವ್ಯವಸ್ಥೆಗೆ ಟೆಂಡರ್ ಕರೆದದ್ದನ್ನು ನೋಡಿದೆ. ಇದರಲ್ಲಿ ಲಕ್ಷಾಂತರ (ಕೋಟಿಯೂ ಇರಬಹುದು) ಹುಡಿ ಹಾರಿಸಿದ ಮೇಲೆ ಸೇರುವ ಪುಸ್ತಕಗಳೇನೇನು ಎಂದು ಯೋಚಿಸಿದರೆ ವಿಷಾದವೊಂದೇ ಉಳಿಯುತ್ತದೆ. ಎಲ್ಲಾ ವಿವಿನಿಲಯಗಳು, ಇಲಾಖೆಗಳು ತಮ್ಮ ಮಾಸಲು, ಗೆದ್ದಲುಹಿಡುಕ ಪುಸ್ತಕಗಳ ಹೊರೆಯೊಡನೆ ಬೀಡುಬಿಟ್ಟು ಕನಿಷ್ಠ ೨೫% ರಿಂದ ೫೦%ರವರೆಗೆ ರಿಯಾಯ್ತೀ ವ್ಯಾಪಾರ ಭಯಂಕರವಾಗಿ ನಡೆಸುತ್ತಾರೆ.

ಮತ್ತೆ ಕೆಲವು ತಾಕತ್ತಿನ ಪ್ರಕಾಶನ ಸಂಸ್ಥೆಗಳು ನಾಲ್ಕೆಂಟು ಗುಪ್ತನಾಮಗಳಲ್ಲಿ ಹರಡಿ, ಮೇಳದ ಆಯಕಟ್ಟಿನ ಜಾಗಗಳಲ್ಲೆಲ್ಲಾ ತಮ್ಮ ಪ್ರಕಟಣೆಗಳ ಹೆದ್ದೆರೆಗಳನ್ನು ಎಬ್ಬಿಸಿ ಗಿರಾಕಿಗಳನ್ನು ಕೆಡವಲು ವ್ಯೂಹ ರಚಿಸುತ್ತಾರೆ. ಅಪ್ಪಿ ತಪ್ಪಿ ನುಗ್ಗಿದ ಸಣ್ಣಪುಟ್ಟ ಪ್ರಕಾಶಕರು ಒಂದೋ ಶರಣಾಗಿ ಅಥವಾ ಹತಾಶೆಯಿಂದ ಬಳಲುತ್ತಿರುತ್ತಾರೆ.

ಮತ್ತೆ ಚಾಟ್ ಜ್ಯಾಮ್‍ಗಳು, ಅತ್ಯುತ್ತಮ ಟೊಪ್ಪಿ ಹೊಲಿಯುವುದು ಹೇಗೆ, ಹಕ್ಕಿ ಕವಡೆ ಶಾಸ್ತ್ರದವರಂತೂ ಬೇಕೇ ಬೇಕು – ಮೇಳದ ಕೊನೆಯಲ್ಲಿ ‘ಯಶಸ್ಸಿನ ಮಾನಕ’ ಇರುವುದೇ ಇವರ ಕೈಯಲ್ಲಿ.
ಹಾಯ್ ಕನ್ನಡ ತಾಯ್!

ಅಶೋಕವರ್ಧನ

ವಿಜ್ಞಾನ ಪ್ರಶಸ್ತಿ ಪ್ರಕಟ

ನುಡಿಸಿರಿ ಉದ್ಘಾಟಕರಾಗಿ ಎಚ್.ಎಸ್.ವಿ…

ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ಆಯೋಜಿಸುತ್ತಿರುವ ಕನ್ನಡ ನಾಡುನುಡಿಯ ರಾಷ್ಟ್ರೀಯ ಸಮ್ಮೇಳನ ಆಳ್ವಾಸ್ ನುಡಿಸಿರಿ -2010 ರ ಉದ್ಘಾಟನೆಯನ್ನು ಕನ್ನಡದ ಪ್ರಸಿದ್ಧ ಕವಿ ಡಾ.ಎಚ್.ಎಸ್.ವೆಂಕಟೇಶ ಮೂರ್ತಿ ನೆರವೇರಿಸಲಿದ್ದಾರೆ.

ಅಕ್ಟೋಬರ್ 29ರಂದು ಬೆಳಗ್ಗೆ 9:30ಕ್ಕೆ ಸಮ್ಮೇಳನದ ಉದ್ಘಾಟನೆ ನಡೆಯಲಿದೆ ಎಂದು ಡಾ. ಎಂ.ಮೋಹನ ಆಳ್ವ ತಿಳಿಸಿದ್ದಾರೆ. ಸಮ್ಮೇಳನವು ಕನ್ನಡ ಮನಸ್ಸು ಜೀವನ ಮೌಲ್ಯಗಳು
ಎಂಬ ಪರಿಕಲ್ಪನೆಯಡಿ ಅಕ್ಟೋಬರ್ 29 ರಿಂದ 31ರವರೆಗೆ ವೈದೇಹಿಯವರ ಅಧ್ಯಕ್ಷತೆಯಲ್ಲಿ ನಡೆಯಲಿದೆ.

ಮಾಹಿತಿ : ಈ ಕನಸು

ನೀರ ಹಾಡು: ‘ಸಂಜೆಯ ಅಪರಿಚಿತರು’…

-ಎಂ.ಆರ್.ಗಿರಿಜ

ಮುಗಿಲ ಮಾರಿಗೆ ರಾಗರತಿಯ ನಂಜ ಏರಿತ್ತ .

ಆಗ – ಸಂಜೆಯಾಗಿತ್ತ

(-ಬೇಂದ್ರೆ)

ಅಲೆದಾಟ ಮೊದಲಿನಿಂದಲೂ ನನ್ನ ಸಂಜೆಗಳ ಒಂದು ಭಾಗ ಸಂಜೆ ಸಂಜೆಯೇ. ಅದರ ಕಂಪು, ಗತ್ತು ಸುಂದರ ಮುಂಜಾವಿಗೂ ಇಲ್ಲ . ಸಂಜೆ ಮುದುಡುವುದೆಂದರೆ ಕನಸುಗಳು ಅರ್ಧದಲ್ಲೇ ಅರಳದೆ ನಿಂತುಬಿಟ್ಟಂತೆ.

ಸುಂದರ ಸಂಗೀತ ಕಛೇರಿ ಉತ್ಕಟತೆ ನುಟ್ಟುವಷ್ಟರಲ್ಲಿ ತಟ್ಟನೆ ಕರೆಂಟ್ ಕೈಕೊಟ್ಟಂತೆ. ಬಟ್ಟೆ ಅಂಗಡಿ, ಪಾನಿಪುರಿ, ಕೇಕ್ ಅಂಗಡಿಗಳ ಮುಂದೆ ’ ಸುಳಿದಾಡಬೇಡ ಗೆಳತಿ’ ಎಂದು ಬುದ್ದಿ ಹೇಳಿದರೂ ಅದನ್ನು ಕೇಳುತ್ತಾ ಕೂರುವ ಜೀವವಲ್ಲ ನನ್ನದು.

ಅದರಲ್ಲೂ ಐಸ್ ಕ್ರೀಂ ಮೆಲ್ಲೂತ್ತಲೋ, ಪಾಪ್‌ಕಾರ್ನ್ ತಿನ್ನುತ್ತಲೋ ಜನದಟ್ಟಣೆಯ ನಗರ ಪ್ರದೇಶದಲ್ಲಿ ಒಬ್ಬಳೇ ತಿರುಗಾಡುವುದೆಂದೆರೆ ಅಚ್ಚುಮೆಚ್ಚು. ಇದು ’ದೋಸ್ತ್ ದೋಸ್ತ್ ನ ರಹಾ’ ತರಹದ ಒಂಟಿತನವಲ್ಲ. ಏಕಾಂತದ ಧ್ಯಾನ, ಜನರಾಣ್ಯದ ಬೆಳಕಿನಲ್ಲಿ ಜೀವೋನ್ಮಾದದ ಹುಡುಕಾಟ.

ಸುಮ್ಮನೆ ಯಾವ ಪರಿಚಿತರ ಕಣ್ಣಿಗೂ ಬೀಳದೆ ನಿರುಮ್ಮಳವಾಗಿ ಇರುವ ಸುಖದಲ್ಲೇ ಅದೇಷ್ಟು ಸುಖ? ಪುಟ್ಟ ಊರುಗಳಿಗೆ ಹೋಲಿಸಿದರೆ ದೊಡ್ಡ ಊರು ಆಕರ್ಷಕವಾಗಲು ಇದೂ ಕಾರಣವಿರಬೇಕು. ಪುಟ್ಟ ಊರಿನಲ್ಲಿ ಬದುಕಿದರೆ ಎಲ್ಲರ ಕಣ್ಣುಗಳಲ್ಲಿಯೂ ಮಿಕ್ಕೆಲ್ಲರ ಚಿರಪರಿಚಯ ಖಾಯಂ ಆಗಿ ಉಳಿದು ಬಿಟ್ಟಿರುತ್ತದೆ.

ಎದುರಿಗೆ ವ್ಯಕ್ತಿ ಸಿಕ್ಕೊಡನೆ ಅವರಿರಲಿ, ಅವರ ಸುತ್ತ ಹತ್ತು ಜನರ ಕಂತೆ ಪುರಾಣಗಳೂ ಮಿದುಳಿನಲ್ಲಿ ಒಂದೊಂದೇ ತರೆದುಕೊಂಡು ಬಿಡುತ್ತವೆ. ಊಹೆಗೆ ಅವಕಾಶವಿಲ್ಲ. ಇನ್ನು ಅಪರಿಚಿತತೆಯ ಆನಂದವಂತೂ ಇಲ್ಲೇ ಇಲ್ಲ.

ನಗರದ ಜನದಟ್ಟಣೆಯ ಶಾಪಿಂಗ್ ಕಾಂಪ್ಲೆಕ್ಸ್‌ಗಳ ಬಳಿಯೋ , ಪಾರ್ಕಿಂಗ್ ಸ್ಥಳದ ಬಳಿಯೋ ಪಾರ್ಕಿನೊಳಗೋ ಸುಮ್ಮನೆ ಕೂತರೆ ಸಾಕು, ನಮ್ಮ ಮುಂದೆ ಅನಾವರಣಗೊಳ್ಳುವ ಪ್ರಪಂಚಕ್ಕೆ ಅದೆಷ್ಟು ಬಣ್ಣ! ಅಲ್ಲಿ ಸಿಳಿದಾಡುವ ಮುಖಗಳಲ್ಲಿ ಕುಣಿಯುವ ಅಂತಃ ಕರಣದ ಕಾಲುವೆಯ ವಿವಿಧ ಆವೆಮಡಿಕೆಗಳ ಕಂಪು, ರಂಗನ್ನು ಸವಿಯುತ್ತಾ ಕೂರುವುದಿದೆಯಲ್ಲ, ಇದಕ್ಕಿಂತ ದೊಡ್ಡ ಕ್ಲಾಸ್‌ರೂಂ ಎಲ್ಲಿ ಸಿಗುತ್ತದೆ?

ಸಂಜೆ ಚೆಲುವು ತುಂಬಿಕೊಳ್ಳುವ ಪಾರ್ಕಿನಲ್ಲಿ ಮುದ್ದು ಮದ್ದಾಗಿ ನಡೆಯುವ ಮಕ್ಕಳು, ದಿನದ ವಾರದ ದುಗುಡ ಉಮ್ಮಳ ಹಂಚಿಕೊಳ್ಳುತ್ತಾ ಮಧ್ಯಾಹ್ನದ ಕಾವನ್ನು ಹೊಎಚೆಲ್ಲುತ್ತಿರುವ ಕಲ್ಲಿಬೆಂಚಿಗೆ ಬೆನ್ನು ಒಎಗಿಸಿ ಕೂತ ಯುವದಂಪತಿಗಳ ಜೋಡಿ .. .. ಇವರೆಲ್ಲಾ ನನ್ನ ಕನಸಿನ ಬಲೆಯಲ್ಲಿ ಅಪರಿಚಿತೆಯ ನಸುಬಿಸಿಯ ಅದೃಶ್ಯ ತಂತುವಿನ ಮೂಲಕ ನನ್ನ ಆತ್ಮೀಯ ವಲಯಕ್ಕರ ಬಂದವರು.

ಮಾತಿಲ್ಲ ಕತೆಯಿಲ್ಲ. ಗುರುತು ಪರಿಚಯವಂತೂ ಆಗುವುದೂ ಇಲ್ಲ. ಆದರೂ ಜೀವನದ ಆ ಒಂದೊಂದು ಫ್ರೇಮುಗಳು ನನ್ನ ಮನಸ್ಸಿನ ಕ್ಯಾನ್ ವಾಸನ್ನು ಬಂಧಿಸಿ ಚಚ್ಚೌಕಗೊಳಿಸುತ್ತವೆ. ನಾನು ಅವರಂತಲ್ಲದ, ನನ್ನನ್ನು ಅವರು ನೋಡದ, ಕೇಳದ ಈ ಮೌನದಲ್ಲೇ ಒಂದು ಮಧುರಾಲಾಪವಿದೆ. ಅದೃಶ್ಯ ತಂತುವಿನ ಮೂಲಕ ನಡೆಯುವ ನಿಶಬ್ದ ಪ್ರಪಂಚವಿದೆ. ಅದು ಭರವಸೆಯ ಒಂದು ಬೀಜದ ಮೊಳಕೆ

ಜಯಶ್ರೀ ಕಿಕ್ಕಿಂಗ್ ಕಾಲಂ: ಕಮಾನ್ ಟ್ರೈ ಇಟ್ ಯ :-)

ಸಮಯ ವಾಹಿನಿ ಚಂದ್ರೇ ಗೌಡ್ರು, ಟೀವಿ ನೈನ್ ಲಕ್ಷ್ಮಣ್ ಹೂಗಾರ್, ಸುವರ್ಣ ನ್ಯೂಸ್ ರಂಗನಾಥ್ ಸರ್ ತಮ್ಮ ಅಮೂಲ್ಯ ಸಮಯವನ್ನು ಚರ್ಚೆಯಿಂದ, ಚರ್ಚೆಗಾಗಿ ಚರ್ಚೆಗೋಸ್ಕರ ಮೀಸಲಿಟ್ಟರು :-). ಪ್ರಸ್ತುತ ರಾಜಕೀಯದ ವಸ್ತುಸ್ಥಿತಿಯ ಬಗ್ಗೆ ಇದ್ದ ಕಾರ್ಯಕ್ರಮಗಳು ಆಸಕ್ತಿಯಿಂದ ಕೂಡಿತ್ತು. ಒಂದಷ್ಟು ವರ್ಗಕ್ಕೆ ಮಾತ್ರ ಇಂತಹ ಕಾರ್ಯಕ್ರಮಗಳು ಅಗತ್ಯ ಅನ್ನಿಸುವುದು, ಆದರೆ ಆ ವರ್ಗದ ವೀಕ್ಷಕವನ್ನು ಒಲಿಸುವ ನಿರಂತರ ಪ್ರಯತ್ನವನ್ನು ನ್ಯೂಸ್ ಚಾನೆಲ್ ಗಳು ಮಾಡ್ತಾ ಇರುತ್ತದೆ.

ಇಲ್ಲಿ ನಿರ್ಲಕ್ಷಿತ ವರ್ಗ ಅಂದ್ರೆ ಮಹಿಳಾ ವೀಕ್ಷಕರು :-). ಅವರು ಛಿ ಇದು ಒಂದು ಕಾರ್ಯಕ್ರಮನಾ ಎಂದು ಮುಖಮೂರು ಕಡೆ ಮಾಡ್ತಾರೆ:-). ಸೊ ನ್ಯೂಸ್ ಚಾನೆಲ್ನವರೆ ಇದರಿಂದ ನೀವು ಗೆದ್ದ ಲಿಸ್ಟೆಗೆ ಸೇರಲ್ಲ,ಹೆಚ್ಚು ಹೆಚ್ಚು ಯಾರು ಮಹಿಳಾ ವೀಕ್ಷಕರನ್ನು ಆಕರ್ಷಿಸ್ತಾರೋ ತಮ್ಮ ಮಾತಿನ ಶೈಲಿಯಿಂದ, ಅವರೇ ಬೆಸ್ಟ್ ನಿರೂಪಕರು:-)ಅರ್ರೇ ಕಮಾನ್ ಟ್ರೈ ಇಟ್ ಯ 🙂

ಪೂರ್ಣ ಓದಿಗೆ: ಮೀಡಿಯಾ ಮೈಂಡ್

ಸಾಹಿತ್ಯ ಸಂಜೆ ಅಕ್ಟೋಬರ್ …

‘ಪ್ರವಾದಿ ‘…

ನಾಟಕ: ‘ಪ್ರವಾದಿ’ (ಕನ್ನಡ)

ನಿರ್ದೇಶನ : ಯೋಗೇಶ್ ಮಾಸ್ಟರ್

ದಿನಾಂಕ: ಅಕ್ಟೋಬರ್ 2

ಸಮಯ: 4pm

ಸ್ಥಳ: ಸೇವಾಸದನ , 14th  ಕ್ರಾಸ್ ಮಲ್ಲೇಶ್ವರಂ , ಬೆಂಗಳೂರು

ಈ ಜೋಳಿಗೆಗೆ ಅನಾಥ ಮಕ್ಕಳನ್ನು ಹಾಕಿ..

ಗಾನ ವಿದ್ಯಾ ಬಡೀ ಕಠಿಣ ಹೈ

-ಸಿದ್ಧು ಯಾಪಲಪರವಿ

ಸಿದ್ಧು ಕಾಲ

ಪರಮ ಪೂಜ್ಯ ಪಂಡಿತ ಪುಟ್ಟರಾಜ ಗವಾಯಿಗಳು ೯೭ರ ಪ್ರಾಯದಲ್ಲಿ ಲಿಂಗೈಕ್ಯರಾದ ಸಂದರ್ಭದಲ್ಲಿ ಅಂಧಕಲಾವಿದನೊಬ್ಬ ಮರದ ಕೆಳಗೆ ನಿಂತು ಅನಾಥವಾಗಿ ರೋಧಿಸುತ್ತಿದ್ದ. ಹೆತ್ತವರಿಗೆ ಬೇಡವಾದ, ಬಸ್ ನಿಲ್ದಾಣದಲ್ಲಿ ಭಿಕ್ಷೆ ಬೇಡುತ್ತಿದ್ದ ಕುರುಡ ಬಾಲಕನನ್ನು ವಿರೇಶ್ವರ ಪುಣ್ಯಾಶ್ರಮಕ್ಕೆ ಕರೆತಂದು ಸಾಕಿ, ಸಲುಹಿ, ಸಂಗೀತ ಅಭ್ಯಾಸ ನೀಡಿ ಬೆಳೆಸಿದರು. ಪರಿಣಾಮ ಈಗ ಈ ಕಲಾವಿದ ನಾಗಯ್ಯ ಸರಕಾರಿ ಶಾಲೆಯಲ್ಲಿ ಶಿಕ್ಷಕನಾಗಿ ಸೇವೆ ಸಲ್ಲಿಸುತ್ತಾ ಸ್ವಾಭಿಮಾನಿ ಬದುಕು ಸಾಗಿಸುತ್ತಿದ್ದಾನೆ.

ಇಂತಹ ಸಾವಿರಾರು ಉದಾಹರಣೆಗಳನ್ನು ಡಾ. ಪಂ. ಪುಟ್ಟರಾಜ ಕವಿಗವಾಯಿಗಳು ನಮ್ಮೊಂದಿಗೆ ಬಿಟ್ಟು ಹೋಗಿದ್ದಾರೆ. ಭಕ್ತರ ಪಾಲಿನ ನಡೆದಾಡುವ ದೇವರೆಂದು, ಸಂಗೀತಗಾರರಿಗೆ ಉಭಯಗಾನ ವಿಶಾರದರೆಂದು ಖ್ಯಾತಿ ಪಡೆದಿದ್ದ ಡಾ. ಪುಟ್ಟರಾಜ ಕವಿ ಗವಾಯಿಗಳು ಮೂಲತಃ ಹಾನಗಲ್ ತಾಲೂಕಿನ ದೇವರ ಹೊಸಪೇಟೆಯವರು.

ಬಾಲ್ಯದಲ್ಲಿ ಆಕಸ್ಮಿಕವಾಗಿ ಕಣ್ಣುಕಳೆದುಕೊಂಡ ಪುಟ್ಟಯ್ಯ ಅಂಧ ಅನಾಥರ ಕುಬೇರರೆನಿಸಿಕೊಂಡಿದ್ದ ಪಂಚಾಕ್ಷರಿ ಗವಾಗಳವರ ಕೃಪೆಗೆ ಪಾತ್ರರಾದರು. ಸಮರ್ಥ ಗುರುಗಳ ಸಾಧಕ ಶಿಷ್ಯರಾಗಿ ಸಂಗೀತ ಅಭ್ಯಾಸ ಮಾಡಿದರು.

ಬಾಹ್ಯದ ನೋಟವಿರದಿದ್ದರು ಅಂತರಂಗದ ಕಣ್ಣನ್ನು ಸದಾ ಜಾಗೃತವಾಗಿಟ್ಟುಕೊಂಡು ಸಂಗೀತಾಭ್ಯಾಸ ಮಾಡಿ ಸಾಧಕರಾದರು. ಬಸರಿಗಿಡದ ವಿರಪ್ಪನವರು ದಾನ ಮಾಡಿದ ಗದುಗಿನ ಜಾಗೆಯಲ್ಲಿ ವಿರೇಶ್ವರ ಪುಣ್ಯಾಶ್ರಮ ತಲೆ ಎತ್ತಿ ನಿಂತಿತ್ತು. ನೂರಾರು ಅಂಧ ಅನಾಥ ವಿಕಲಚೇತನ ಮಕ್ಕಳಿಗೆ ಪಂಚಾಕ್ಷರಿ ಗವಾಗಳು ಸಂಗೀತಾಭ್ಯಾಸ ನೀಡುತ್ತಿದ್ದರು. ಅಂಧತ್ವದ ಶಾಪವನ್ನು ಗ್ರಹಿಸಿದ್ದ ಗವಾಗಳು ಅವರಿಗೆ ಸ್ವತಂತ್ರವಾಗಿ ಬದುಕುಸಾಗಿಸಲು ಆತ್ಮ ವಿಶ್ವಾಸ ತುಂಬುವುದಲ್ಲದೆ ಜೀವನೋಪಾಯಕ್ಕಾಗಿ ಸಂಗೀತ ಹಾಗೂ ಪ್ರವಚನ, ಪುರಾಣ ಕಲೆಯನ್ನು ಕಲಿಸುತ್ತಿದ್ದರು. ಆಳವಾಗಿ ಅಧ್ಯಯನ ಮಾಡಿ ಸಾಧನೆಗೈದವರು ಶ್ರೇಷ್ಠ ಗಾಯಕರಾಗಿ ಹೊರಹೊಮ್ಮಿದ್ದಾರೆ, ಸಾಧಾರಣ ಪ್ರತಿಭೆ ಹೊಂದಿದವರು ಹೇಗೋ ಜೀವನ ನಡೆಸಲು ಗುರುಗಳು ಕೃಪೆ ತೋರಿದರು. ಈ ಕ್ರಿಯೆ ೨೦ನೆಯ ಶತಮಾನದ ಪವಾಡವೇ ಸರಿ.