ನಾನು
ಈ ರಾತ್ರಿ ಮಳೆಯಾಗುತ್ತದೆ
ಎಂದು ಕಾಯುತ್ತಿದ್ದೇನೆ.
–
ಬೆಳಗ್ಗೆ ಭಯಂಕರ ಸೆಕೆ, ಮಗಳು
ಅದ್ಯಾರ ಜೊತೆಗೋ ಓಡಾಡುತ್ತಿದ್ದಾಳೆ
ಎಂಬ ಅನುಮಾನ, ಅಮ್ಮನಿಗೂ
ಅಪ್ಪನಿಗೂ ಇಳಿವಯಸ್ಸಿನ ಜಗಳ,
ಹಂಡೆಯಲ್ಲಿ ಕೊಳೆತ ಮೀನು
ಮೈತುಂಬ ಮತ್ಯ್ಸಗಂಧ.
–
ಈ ರಾತ್ರಿ ಮಳೆಯಾಗುತ್ತದೆ
ಎಂಬ ನಿರೀಕ್ಷೆ.
–
ಊರು ತುಂಬ ಗಲಾಟೆ, ಅದ್ಯಾರಿಗೂ
ನನ್ನ ಮೇಲೆ ಸಿಟ್ಟು, ಮತ್ಯಾರಿಗೋ ಹೊಟ್ಟೆಕಿಚ್ಚು.
ಮಾತಾಡಿದರೆ ತಕರಾರು, ಸುಮ್ಮನಿದ್ದರೆ
ಸಂಕಟ. ಉಸಿರು ಒಳಗೆಳೆದುಕೊಂಡರೆ
ಸೀಸ, ಕಾರ್ಬನ್ನು. ನನಗಾಗಿಯೇ ಕಾಯುತ್ತಿರುವ
ಸಂಚಾರಿ ಪೊಲೀಸು.
–
ಇವತ್ತು ರಾತ್ರಿ ಮಳೆಯಾಗುತ್ತದೆ
ಎಂದು ಹವಾಮಾನ ವರದಿ.
–
ವಿಪರೀತ ರಕ್ತದೊತ್ತಡ, ಔಷಧಿ ಅಂಗಡಿಗೆ
ರಜಾ. ಪತ್ರಿಕೆಯಲ್ಲಿ ಪಂಚರಂಗಿ ಗೆದ್ದ ಸುದ್ದಿ
ಭಾರತೀಯ ಕ್ರಿಕೆಟ್ ಟೀಮಿಗೆ ಹೀನಾಯ ಸೋಲು
ಕಿರುಚುವ ಅವಳು, ಪರಚುವ ಅವನು,
ಕ್ಷಣಕ್ಷಣಕ್ಕೂ ಬಡಕೊಳ್ಳುವ ಮೊಬೈಲು.
ನಾನೇ ತುಳಿದುಕೊಂಡ ನನ್ನದೇ ಕಾಲು.
–
ಈ ರಾತ್ರಿ ಮಳೆಯಾಗುತ್ತದೆ ಎಂದು ಕುರುಡುಗಣ್ಣಲ್ಲಿ
ಆಕಾಶ ನೋಡುವ ಅಪ್ಪನ ಭವಿಷ್ಯ
–
ಹೊಡೆದಾಡುವ ಮಂತ್ರಿಮಂಡಲ
ರಾಜೀನಾಮೆ ನಾಟಕ, ಮುಗಿಯದ ಮೆಟ್ರೋ
ಪ್ರತಿಕೃತಿ ಸುಟ್ರೋ, ಬಿಗ್ಬಜಾರಿನಲ್ಲಿ ಒಂದಕ್ಕೆರಡು
ಫ್ರೀ, ಮನೆತುಂಬ ಬೇಡದ ಕುರ್ಚಿ, ಮೇಜು, ಹೂಕುಂಡ.
ಯುಮುನೆಗೆ ಮಹಾಪೂರ, ಪರಸಂಗದ ಸಚಿವನಿಗೆ
ವೀರ್ಯಪರೀಕ್ಷೆಯಲ್ಲಿ ಸೋಲು.
ಆ ರಾತ್ರಿ ಮಳೆಯಾಯಿತು. ನನಗೋ ಗಾಢ ನಿದ್ದೆ.
ಎದ್ದು ಕಿಟಕಿ ಬಳಿ ಕುಳಿತು
ಜಗತ್ತನ್ನೇ ಶಪಿಸುತ್ತಾ….
–
ಈ ರಾತ್ರಿ ಮಳೆಯಾಗುತ್ತದೆ
ಎಂದು ಕಾಯುತ್ತಿದ್ದೇನೆ
ashok shettar
ಸೆಪ್ಟೆಂ 23, 2010 @ 12:51:13
ಗಿರೀಶ್ ರ ಕವಿತೆ (ಈ ರಾತ್ರಿ ಮಳೆಯಾಗುತ್ತದೆ) ಯಲ್ಲಿ ಒಂದು nauseating ಸ್ಥಿತಿಯಿಂದ ವಿಮೋಚನೆಗೊಳಿಸುವ ರೂಪಕವಾಗಿ ಮಳೆಯ ಕಲ್ಪನೆ ಚೆನ್ನಾಗಿದೆ. ಒಳ್ಳೆ ಕವಿತೆ..
Pamparaddy
ಸೆಪ್ಟೆಂ 22, 2010 @ 19:20:11
very nice …..!
ಆತ್ರಾಡಿ ಸುರೇಶ ಹೆಗ್ಡೆ
ಸೆಪ್ಟೆಂ 21, 2010 @ 13:23:50
ಹೂಂ… ನಿಜಕ್ಕೂ ಈ ರಾತ್ರಿ ಮಳೆಯಾಗುತ್ತದೆ.
Sunil Kumar KM
ಸೆಪ್ಟೆಂ 21, 2010 @ 11:05:36
Tumba chennagide 😉
savitri
ಸೆಪ್ಟೆಂ 21, 2010 @ 10:35:48
Poem is very nice Sir.