ಆಕಾಶದಿಂದ ಭೂಮಿಗೆ..

nirantara0001

ನಿಲ್ಲು ನಿಲ್ಲೇ ಪತಂಗ, ಬೇಡ ಬೆಂಕಿಯ ಸಂಗ….

ಹಾಡು ಹುಟ್ಟಿದ ಸಮಯ

551

-ಎ ಆರ್ ಮಣಿಕಾಂತ್

ಚಿತ್ರ: ಎಡಕಲ್ಲು ಗುಡ್ಡದ ಮೇಲೆ

ಗೀತೆರಚನೆ: ವಿಜಯನಾರಸಿಂಹ

ಸಂಗೀತ: ಎಂ. ರಂಗರಾವ್

ಗಾಯನ: ಎಸ್. ಜಾನಕಿ

ನಿಲ್ಲೇ ಪತಂಗ ನಿಲ್ಲು ನಿಲ್ಲೇ ಪತಂಗ

ಬೇಡ ಬೇಡ ಬೆಂಕಿಯ ಸಂಗ ||ಪ||

ಕಾಣದ ಜ್ವಾಲೆ ಕಾಮದ ಲೀಲೆ

ಕಾಡುತ ಹಾಡಿದೆ ಕಣ್ಣುಮುಚ್ಚಾಲೆ

ಕ್ಷಣಿಕದ ಚಪಲಕೆ ಬಲಿಯಾಗುವೆಯಾ

ಶ್ರೀಮತಿ ಎನಿಸಿ ಮತಿ ನೀಗುವೆಯಾ? ||1||

ಧರ್ಮದ ಸೇವಕಿ ನೀನಾಗುವೆಯೋ

ನರಕದ ನಾಯಕಿ ನೀನೆನಿಸುವೆಯೋ

ಕಾರ್ಕೋಟಕ ವಿಷ ನೀ ಭರಿಸುವೆಯಾ

ಅಮೃತ ವಾಹಿನಿ ನೀನಾಗುವೆಯಾ? ||2||

ವಿನಾಶದ ಸುಳಿಗೆ ಸಿಲುಕದೆ ಬಾ

ವಿಷದ ಕೂಪಕೆ ಜಾರದೆ ಬಾ

ವಿವೇಕದ ಗಡಿಯ ಮೀರದೆ ಬಾ

ವಿವಾಹ ಜೀವನ ಪೂಜೆಗೆ ಬಾ ||3||

beautiful_butterfly_tattoo

ಒಂದು ಸಿನಿಮಾ ಗೆಲ್ಲಬೇಕೆಂದರೆ, ಅದರಲ್ಲಿ ಚೆಂದದ ಕಥೆ, ಬಿಗಿಯಾದ ಚಿತ್ರಕತೆ, ಚುರುಕಾದ, ಚಿನಕುರುಳಿಯಂಥ ಸಂಭಾಷಣೆ ಇರಬೇಕು. ವಾಹ್ ವಾಹ್ ಎಂಬಂಥ ಛಾಯಾಗ್ರಹಣವಿರಬೇಕು. ಸಂಕಲನ ಚುರುಕಾಗಿರಬೇಕು. ಇದರ ಜತೆಗೆ ಮಧುರ ಸಂಗೀತವಿರಬೇಕು, ಇಂಪಾದ ಹಾಡುಗಳಿರಬೇಕು… ಈ `ರಹಸ್ಯ’ವನ್ನು ಅರ್ಥಮಾಡಿಕೊಂಡಿದ್ದ ನಿರ್ದೇಶಕರ ಪೈಕಿ ಪುಟ್ಟಣ್ಣ ಕಣಗಾಲ್ ಮತ್ತು ದೊರೆ-ಭಗವಾನ್ ಪ್ರಮುಖರು.

ಅದರಲ್ಲೂ ಪುಟ್ಟಣ್ಣ ಕಣಗಾಲ್ ಅವರಿಗೆ ತಮ್ಮ ಸಿನಿಮಾದ ಹಾಡುಗಳ ಬಗ್ಗೆ ಒಂದು ಐಡಿಯಾ ಇರುತ್ತಿತ್ತು. ಹಾಡಿನ ಸಾಲುಗಳು ಹೀಗೇ ಇರಬೇಕೆಂದೂ ಅವರಿಗೊಂದು ಅಂದಾಜಿರುತ್ತಿತ್ತು. ಇದನ್ನು ನೆನಪುಮಾಡಿಕೊಂಡೇ ಅದೊಮ್ಮೆ ದಲಿತ ಕವಿ ಸಿದ್ಧಲಿಂಗಯ್ಯ ಹೇಳಿದ್ದರು: ಪುಟ್ಟಣ್ಣ ಕಣಗಾಲ್ ಅವರಿಗೆ ಅಪರೂಪದ ಪಾಂಡಿತ್ಯವಿತ್ತು. ಕನ್ನಡ ಭಾಷೆಯ ಮೇಲೆ, ಪದ ಬಳಕೆಯ ವಿಷಯದಲ್ಲಿ ಒಬ್ಬ ವಿದ್ವಾಂಸನಿಗಿರುತ್ತಲ್ಲ? ಅಷ್ಟರಮಟ್ಟಿಗಿನ ತಿಳಿವಳಿಕೆಯಿತ್ತು. ತಮ್ಮ ಸಿನಿಮಾದ ಹಾಡುಗಳು ಸನ್ನಿವೇಶದ ತೀವ್ರತೆಯನ್ನು ಹೆಚ್ಚಿಸುವುದರ ಜತೆಗೆ, ಪ್ರೇಕ್ಷಕರಿಗೆ ಒಂದು ಸಂದೇಶವನ್ನೂ ನೀಡುವಂತಿರಬೇಕು ಎಂದು ಅವರು ಸದಾ ಬಯಸುತ್ತಿದ್ದರು…’

ತಮ್ಮ ಸಿನಿಮಾಗಳಿಗೆ ಪುಟ್ಟಣ್ಣನವರು ಹಾಡು ಬರೆಸುತ್ತಿದ್ದ ಶೈಲಿ ಕೂಡ ವಿಶಿಷ್ಟವೇ. `ಸಂಗೀತ ನಿರ್ದೇಶಕರು ಟ್ಯೂನ್ ಕೇಳಿಸ್ತಾರೆ. ಅನಂತರ ನೀವು ಹಾಡು ಬರ್ಕೊಂಡು ಬನ್ನಿ’ ಎಂದು ಅವರು ಎಂದೂ ಹೇಳುತ್ತಿರಲಿಲ್ಲ. ಕಥೆ-ಚಿತ್ರಕಥೆ ಸಿದ್ಧವಾದ ನಂತರ, ಇಂತಿಂಥ ಸಂದರ್ಭಗಳಲ್ಲಿ ಹಾಡು ಬರಬೇಕು ಎಂದು ಅವರೇ ನಿರ್ಧರಿಸುತ್ತಿದ್ದರು. (ಈ ವಿಷಯದಲ್ಲಿ ನಿರ್ಮಾಪಕರೂ ಸೇರಿದಂತೆ ಯಾರೇ ಹಸ್ತಕ್ಷೇಪ ಮಾಡುವುದನ್ನೂ ಅವರು ಸಹಿಸುತ್ತಿರಲಿಲ್ಲ.) ನಂತರ ಯಾವುದಾದರೂ ಒಂದು ಪ್ರಶಾಂತ ವಾತಾವರಣದ ತಾಣಕ್ಕೆ ಸಂಗೀತ ನಿರ್ದೇಶಕರು, ಗೀತೆರಚನೆಕಾರರೊಂದಿಗೆ ಹೋಗಿ ಒಂದೆರಡು ದಿನ ಅಲ್ಲಿಯೇ ಕ್ಯಾಂಪ್ ಹೂಡಿ, ಟ್ಯೂನ್ ಕೇಳಿಸುತ್ತಿದ್ದರು. ನಂತರ ಗೀತೆರಚನೆಕಾರರನ್ನು ಒಂದಿಷ್ಟು ಹೊಗಳಿ, ಹುರಿದುಂಬಿಸಿ- `ಆ ಶಾರದಾಂಬೆಯನ್ನು ಈಗ ಒಲಿಸಿಕೊಳ್ಳಿ ಕವಿಗಳೇ. ನಿಮ್ಮ ಹಾಡುಗಳು ಈ ಪುಟ್ಟಣ್ಣನ ಸಿನಿಮಾವನ್ನು ಇನ್ನಷ್ಟು ದೊಡ್ಡ ಎತ್ತರಕ್ಕೆ ಕೊಂಡಿಯ್ಯುವ ಹಾಗಿರಲಿ’ ಎನ್ನುತ್ತಿದ್ದರು.

ಪುಟ್ಟಣ್ಣ ಅವರಂಥ ಶ್ರೇಷ್ಠ ನಿದರ್ೇಶಕರು ಹೀಗೆ ಹೇಳುವುದನ್ನು ಕೇಳಿ ಸಹಜವಾಗಿಯೇ ಗೀತೆರಚನೆಕಾರರ ಉತ್ಸಾಹ ಇಮ್ಮಡಿಯಾಗುತ್ತಿತ್ತು. ಹೆಚ್ಚಿನ ಸಿನಿಮಾಗಳಲ್ಲಿ ಪುಟ್ಟಣ್ಣನವರು ಇಬ್ಬರು ಅಥವಾ ಮೂವರು ಗೀತರಚನೆಕಾರರಿಂದ ಹಾಡು ಬರೆಸುತ್ತಿದ್ದರು. ಹೀಗಾಗಿ `ಉಳಿದವರಿಗಿಂತ’ ಚೆನ್ನಾಗಿ ಬರೆಯಬೇಕೆಂಬ ತಪನೆ ಎಲ್ಲರಿಗೂ ಇರುತ್ತಿತ್ತು.

`ಎಡಕಲ್ಲು ಗುಡ್ಡದ ಮೇಲೆ’ ಚಿತ್ರಕ್ಕಾಗಿ `ನಿಲ್ಲು ನಿಲ್ಲೇ ಪತಂಗ’ ಗೀತೆಯನ್ನು ಪುಟ್ಟಣ್ಣ ಹೇಗೆ ಬರೆಸಿದರು ಎಂದು ಹೇಳಲು ಹೊರಟಾಗ ಇದೆಲ್ಲ ನೆನಪಾಯಿತು. ಈ ಹಾಡು ಹುಟ್ಟಿದ ಸಮಯವನ್ನು ವಿವರಿಸುವ ಮೊದಲು ಈ ಹಾಡಿನ ಬಗ್ಗೆ ಪುಟ್ಟಣ್ಣನವರ ಅಭಿಪ್ರಾಯವೇನಿತ್ತು ಎಂದು ತಿಳಿಯೋಣ.

More

%d bloggers like this: